الاعتراف بالفضل

قبل كل شئ اود ان اعرف عن نفسي انا شخص طبيعي أكيد بغلط بس يحاول جاهدا اني أراعي ربنا في كل شئ انا كنت شغال مدير حسابات في شركه بترول إنجليزي اسمها SDX الفرصة دي جلالي بتوفيق من عند ربنا وبمساعده مديري الأسبق اللي اصبح نائب رئيس مجلس الاداره ا.عمرو حامد . الحمد لله انا حاولت اعمل اللي يقدرني ربنا عليه علشان اساعد ان الشركه تقف علي رجليها وبصراحه الناس كلها كانت بتعمل اللي عليها واكتر علشان نفس الهدف بس علشان احنا عايشين في اختبار كبير من عند ربنا ليختبر بيه صبرنا وقوه ايمانا ربنا امر اني اصاب بجلطه في المخ '' كما تم تشخيصها في اول الأمر'' وقعدت في المستشفيات كتير جدا وبداءت احس ان انا خلاص مفيش أمل اني ارجع طبيعي وارجع الشغل تاني رغم ان كل اللي حاوليا أولهم زوجتي و ابي وامي واخي ثم أصدقائي وزمايلي في الشغل كانوا بيحفزوني اني ارجع زي الأول وأحسن . بس اغرب موقف اني لاقت الشركه اللي تقريبا قعدت معاهم مايقرب من سنه بيحاولوا يساعدوني بشتي الطرق سواء ماليا أو معنويا لدرجه ان زملائي في الشغل اقترحوا ان اسافر اكشف في لندن وكانوا عارفين ان الطلب ده هيترفض بس سبحان الله الاداره وافقت وفعلا أتممت إجراءات سفري اللي كلنا ميسره جدااا والحمد لله ولا ايه كمان رئيس الشركه الأمريكي هو اللي كان متابع حالتي في مصر وفي لندن ووقف جانبي هناك زي ما أكون فرد من عائلته سبحان الله كان بياخود باله مني ومن زوجتي حتي ولو كان علي حساب اجتماعات مهمه أو يبعت حد معانا لحد مايخلص. و سبحان الله فعلا مطلعًا عندي جلطه طلع التهاب في جذع المخ وعلاجه بياخد وقت... المهم الغرض من مقالي ده ان مفيش حد يفقد الأمل في الله أبدا حتي ولو أبواب الدنيا كلها قفلت في وسع لانه والله ربنا لايضيع احد إبدا خلي عندك يقين بالله انه ربنا دائما معاك ومعانا بس أنت قول يارب.